História

ZENíZIO (Testo an Mirandés)

Zenízio ye freguesie de l cunceilho de Miranda de l Douro  (14 Kms a NO) i cunfronta al Norte cula freguesie de San Martino, al Sul cun Bilasseco, al Poniente cula freguesie de Caçareilhos i Angueira i al Naciente cula Pruoba i Malhadas.

- Ne l seclo XIX, Zenízio chegou a pertencer al cunceilho de Bumioso. La freguesie ten dous lhugares: Zenízio i la Speciosa, esta mui acerca de l Naso. La ária de l sou termo ten 2982 ha cuntando cula aneixa. Ls fuogos de la freguesie an 1796 éran 50 para 206 moradores, an 1900 éran 136 para 523 moradores, an 1960 éran 255 para 714, an 2001 éran 96 para 233 moradores i an 2011 éran 186 moradores.

- L’eigreija de Zenízio stá a ua altitude de 755 metros i l termo de la freguesie stá assente subretodo an terrenos de Piçarra (xistos cámbricos i ordobícicos),cascalho i barro (depósitos sedimentares cenozóicos). Toda la freguesie bota las augas pa la ribeira de Angueira, subretodo atrabeç la ribeira de Bilasseco.

- Anque se téngan ancuntrado ne l termo bestígios mui antigos de la perséncia de l home, cumo l mais de ls lhugares de l Praino, tamien acraditamos que Zenízio haba tenido ourige mediabal. Assi, ne l seclo XIII (1248) nun decumiento de l mosteiro lhionés de Moreiruola que queda acerca de Çamora, fala-se an Belharino, un de ls quatro Bárrios de l’aldé, que na altura serie un lhugarico apartado. An 1255 Don Alfonso Méndez de Bornes, pa fazer pula sue alma, dá todo l que ten an Geniço als frailes desse mesmo mosteiro. An 1257 l mosteiro merca a Fonso Mendes Bornes, trés casales an Zenízio i la sexagésima parte de San Juan de la Ribeira, dando-le a mais de l cumbén i cumo pínhara, ua buona mula. An 1262, Rui Paç i la sue tie Ourraca Fonso de Bornes, ardeiros de Fonso Mendes de Bornes, dan al mosteiro de Moreiruola todo l que ténen an Zenízio, que solo deixa de star nas puosses de l mosteiro,cula criaçon de la diocese de Miranda na 1545.

- Zenízio fui siempre tierra de muito trigo i Centeno i tubo siempre buns ganados de oubeilhas i buonas bacadas mirandesas.

- A la giente de Zenízio cháman-le “boubielhos”, porque cúntan que ua beç le apareciu Nuossa Senhora – la birge de la coquelhuda – anriba dun silbeiro, streformada an boubielha. Ls zenizienses a bibir an Lisboua fazírun ua associaçon i ponírun-le l nome de “L Nial de la Boubielha"

Hai an Zenízio la Associaçon “Sol Nascente” i l “museu ruralde l lhagar” i tiu Tibério faç facas, pica-puortas i outros ferragachos an fierro fraugado mui pimpones. Para alhá desso ye ua tierra chena de arristas an bárias artes,ancluindo scritores de mirandés que muito ténen cuntribuido pa la lhiteratura mirandesa.

- Santa Oulália ye ourago deste lhugar.